“Mae’r Urdd wastad yn chwilio am ffyrdd i gynnig cyfoeth o brofiadau a chyfleoedd drwy gyfrwng y Gymraeg i blant a phobl ifanc,” meddai Rheolwr Cyhoeddiadau a Chyfathrebu’r Urdd, Branwen Rhys Dafydd.

“Mae cylchgrawn Cip yn adnodd digidol hynod o boblogaidd, sy’n cyrraedd dros 5,000 o danysgrifwyr bob yn ail fis – a hynny’n rhad ac am ddim. Mae’r cylchgrawn yn blatfform i rannu profiadau, barn a llais plant, ac mae’r cartŵn newydd yma gan y cartwnydd ifanc Corb Davies yn ddatblygiad cyffrous yn ein darpariaeth. Mae’r cartŵn yn adlewyrchu bywyd a hiwmor ein darllenwyr ac yn gwneud y Gymraeg yn hygyrch i blant oed cynradd Cymru a thu hwnt.”

Mae’r cyn-ddisgybl o Ysgol Gyfun Gymraeg Glantaf, Corb Davies, wedi bod yn datblygu ei grefft ac yn cyhoeddi cartwnau Cymraeg yng nghylchgrawn Cip ers blwyddyn bellach. Diolch i gefnogaeth ychwanegol gan Gyngor Llyfrau Cymru a Chymru Greadigol, bu i’r Urdd ei gomisiynu i ddatblygu’r cartŵn gwreiddiol yma ar gyfer 4 rhifyn nesaf o’r cylchgrawn.

Fel rhan o’r prosiect, mae Corb wedi cael cyfle i ddatblygu ei grefft a’i sgiliau ymhellach drwy gynnal gweithdy rhannu syniadau yn Ysgol Pen y Bryn, Tywyn ac ymgynghori gyda disgyblion Ysgol Sadwrn – ysgol ddigidol sy’n darparu gwersi Cymraeg i blant o bob cwr o’r byd.

“Dwi mor ddiolchgar i’r Urdd am fy helpu i ddatblygu fy nghrefft fel cartwnydd a rhoi’r cyfle i fi gyhoeddi cartwnau yn y Gymraeg,” meddai Corb Davies. “Roedd hi mor cŵl cydweithio gyda phlant am y tro cyntaf. Ro’n i’n gwerthfawrogi cael cipolwg i mewn i’w byd a’u dychymyg er mwyn datblygu eu syniadau i greu cartŵn sydd yn adlewyrchu eu profiad nhw o Gymru a’r Gymraeg.”

Fel rhan o’r prosiect, cafodd Corb sesiynau mentora gan yr awdures Manon Steffan Ros er mwyn datblygu ei ddawn storia ar gyfer plant a phobl ifanc.

“Dwi wir wedi mwynhau!” meddai Manon Steffan Ros. “Roedd cydweithio efo Corb a gweld y stori a’r lluniau gwych yn dod yn fyw yn gyffrous iawn, mae o mor dalentog. Mae syniadau plant bob amser yn wych ac mae’n grêt gweld cartŵn sy’n adlewyrchu eu bywydau a’u dychymyg. Byddan nhw’n siŵr o chwerthin lot fel dwi di wneud wrth weld y cymeriadau a’r stori’n datblygu.”

Mae cwmni animeiddio Turnip Starfish o Gaerdydd hefyd wedi creu clipiau byr er mwyn dod â’r cymeriadau yn fyw a hyrwyddo’r cylchgrawn.

“Roedd o mor cŵl i weld y cymeriadau dwi wedi’u harlunio yn symud ac yn siarad!” ychwanega Corb. “Dwi wedi dysgu gymaint ac mae’r prosiect wedi magu fy hyder mewn sawl maes. Dwi methu aros i glywed ymateb y plant nawr.”

Mae pennod gyntaf o ‘Boncyrs’ i’w gael yn rhifyn Medi o Cip (cyhoeddwyd 9 Medi 2024) a bydd y stori’n parhau yn rhifynnau Tachwedd, Ionawr a Mawrth.

Mae modd tanysgrifio i dderbyn copi o’r cylchgrawn yn syth i e-bost: urdd.cymru/cylchgronau