Bydd Carys yn cychwyn ar ei rôl newydd ym mis Ebrill ac yn ymuno â Thîm Strategol y Mudiad. Mae ganddi gysylltiad hir â’r mudiad, ers iddi ddechrau fel Swyddog Cefnogi yn Sir y Fflint yn 2004. Yn fuan wedyn, cafodd ei dyrchafu’n Gydlynydd y Gogledd-ddwyrain, wedyn yn Gyfarwyddwr ar draws y Gogledd, ac ar hyn o bryd mae’n Rheolwr Talaith y Gogledd-ddwyrain a’r Canolbarth.

Dywedodd Carys Gwyn:

“Mae cael arwain ar adran a fydd yn dwyn popeth sydd yn ymwneud â chaffael, trosglwyddo a throchi iaith at ei gilydd o fewn y Mudiad trwy amryw gynlluniau yn gyfle cyffrous iawn. Rwy’n edrych ymlaen at gydweithio â nifer o bartneriaethau hen a newydd i gefnogi’r gweithlu, y gwirfoddolwyr a theuluoedd ar eu taith iaith.”

Diben y swydd yw arwain ar adran newydd fydd yn uno sawl cynllun hyfforddiant iaith strategol gan gynnwys Croesi’r Bont, Clebran, Clwb Cwtsh, ac Camau. Bydd yr adran yn canolbwyntio ar ddatblygu a chefnogi sgiliau ieithyddol gweithlu'r sector gofal plant a theuluoedd ledled Cymru.

Dywedodd Dr Gwenllian Lansdown Davies, Prif Weithredwr Mudiad Meithrin:

“Mae Carys yn dod â blynyddoedd o brofiad a gwybodaeth i arwain yr adran newydd hon. Bydd hyn yn ein galluogi i dyfu’n dylanwad ym maes cynllunio ieithyddol ac ymateb i anghenion y gweithlu gofal plant, ysgolion a theuluoedd. Edrychaf ymlaen at gydweithio â hi.”