Ar ôl proses ymgeisio cystadleuol, dewisiwyd saith myfyriwr Cymraeg o Sir Gâr, Ceredigion, Gwynedd a Môn sy’n astudio pynciau amrywiol ym Mhrifysgolion Aberystwyth a Bangor i gymryd rhan yn y cyfle gwerthfawr. 

Fe fyddant yn treulio’r cyfnod yn ystod yr haf yn gweithio gyda Mentrau Iaith Gorllewin Sir Gâr, Gwendraeth Elli, Dinefwr, Cered, Gwynedd a Môn gan ddod â syniadau am brosiectau o’u cyrsiau gradd amrywiol i’w gweithredu yn y Mentrau Iaith.

Dywedodd Jade Owen, Rheolwr Prosiect Llwyddo’n Lleol: “Mae’r profiad hwn yn gyfle gwych i’r myfyrwyr ehangu eu sgiliau yn y gweithle ac ennyn profiad mewn maes sydd o ddiddordeb iddynt, a hynny o fewn eu hardaloedd lleol.” 

Ychwanegodd Catrin Jones o Fenter Iaith Môn: 

“Rydym yn edrych ymlaen yn arw i gael eu cyfraniadau i weithgarwch y Mentrau. 

“Rydym yn cynnal gwyliau cerddorol, clybiau gwyliau, gweithdai a sesiynau sgwrsio yn ystod yr haf, ac fe fydd y criw yn dod ag egni a syniadau newydd i’r gweithgarwch yma.

Mae’r criw fu’n llwyddiannus yn bobl ifanc deallus a brwd ac fe rydym yn ffodus iawn o gael eu hamser dros yr haf.” 

Mae’r cynllun yn ymdrech gan Llwyddo’n Lleol a Mentrau Iaith Cymru i gynyddu ymwybyddiaeth ymysg bobl ifanc o’r maes hyrwyddo iaith fel gyrfa posibl, ac ysbrydoli graddedigion y dyfodol bod modd ffynnu mewn gweithle lleol, drwy wneud gwahaniaeth ymarferol yn eu cymunedau brodorol.

Dywedodd Gwenno Roberts, â fydd yn ymuno â thim Menter Gorllewin Sir Gâr dros yr haf: “Nid yn aml mae’n bosib i fod yn rhan o ymchwilio a threfnu digwyddiadau dwi wedi bod am eu gweld yn fy ardal leol i, ac felly dwi wedi bod yn ffodus iawn i dderbyn cyfle fel hyn gan Llwyddo’n Lleol a Mentrau Iaith Cymru ar fy stepen nrws i. 

“Mae’r iaith Gymraeg a’r gymuned yn bwysig iawn i mi ac felly edrychaf ymlaen at ddechrau’r swydd a dysgu mwy gyda chymorth staff Menter Gorllewin Sir Gâr. 

“Fel myfyrwraig bresennol ym Mhrifysgol Aberystwyth, gobeithiaf y bydd y cyfle yma yn fuddiol i mi wrth i mi ddatblygu fy sgiliau, ymgyfarwyddo â’r byd gwaith ac agor fy llygaid i yrfa posib sydd yn gyfan gwbl drwy gyfrwng y Gymraeg.”

Fel rhan o’r profiad, bydd y saith unigolyn llwyddiannus yn cyfrannu at ymgyrch Llwyddo’n Lleol sy’n ceisio herio’r ystrydeb nad oes modd cael bywyd gyrfaol a chymdeithasol llewyrchus o fewnardaloedd arfordirol Cymru. Dilynwch eu siwrnai dros yr haf ar gyfrifon cymdeithasol Llwyddo’n Lleol neu eich Menter Iaith leol. 

I ddysgu rhagor am y cyfleoedd sydd ar gael drwy brosiect Llwyddo’n Lleol, ewch i: llwyddonlleol2050.cymru