Mae’r gronfa’n cael ei gweinyddu gan fenter gymdeithasol Cadwyn Clwyd, fel rhan o becyn ehangach gwerth £4.75 miliwn i gefnogi cymunedau a busnesau yng Ngogledd Ddwyrain Cymru. 

Roedd Cronfa Allweddol Pobl a Sgiliau Sir Ddinbych ar agor i elusennau, cwmnïau di-elw, mentrau cymdeithasol, ysgolion, cyrff statudol a’r sector gyhoeddus sy'n gweithredu yn Sir Ddinbych ym mis Ebrill. 

Mae Dawn Johnson yn Swyddog Prosiect yn Cadwyn Clwyd, gyda chyfrifoldeb am Gronfa Allweddol Pobl a Sgiliau Sir Ddinbych. Meddai, “Mae Cadwyn Clwyd yn falch iawn o weinyddu'r Gronfa Allweddol Pobl a Sgiliau ar ran Cyngor Sir Ddinbych. 

"Mae cyflwyno'r math yma o gronfa yn rhoi cyfle i ni wneud gwahaniaeth gwirioneddol ym mywydau pobl leol. Bydd yr effaith y bydd y grant hwn yn ei gael ar bobl, eu cymuned a busnesau lleol yn bellgyrhaeddol. 

"Mae'r prosiectau a ariannwyd wedi'u cynllunio'n benodol i helpu pobl i adfer eu hyder, adeiladu hunan-barch a’i gwneud hi’n haws iddyn nhw gael swydd. Maent yn gallu cynnig cwnsela, mentora, hyfforddiant, lleoliadau gwaith, gwirfoddoli a chyfleoedd antur awyr agored ac alldeithiau ledled y sir." 

Un o’r busnesau a dderbyniodd £186,792 o gyllid oedd Canolfan Addysg Awyr Agored Bryntysilio yn Llangollen gyda’u prosiect ‘Sir Ddinbych Hyderus’. 

Bwriad eu prosiect oedd defnyddio’r awyr agored a chanolfan Bryntysilio fel catalydd ar gyfer twf personol a phroffesiynol. 
Pennaeth y Ganolfan, Dr Chris Eastabrook, sy’n esbonio mwy, “Hanfod y prosiect yw defnyddio tirwedd wyllt ein sir hardd ac arbenigedd Bryntysilio i ddatblygu hyder unigolion a’r gred eu bod yn gallu llwyddo. 

“Nid creu hyfforddwyr awyr agored yw’r nod ond newid ffordd o feddwl. Efallai y byddan nhw ar ddechrau’r cwrs yn edrych ar ddŵr gwyllt mewn afon, clogwyn uchel neu gopa mynydd ac yn meddwl, ‘Alla i ddim gwneud hyn’. Ond yna, o fewn ychydig oriau, maen nhw wedi llwyddo. 

“Dyna’r teimlad rydyn ni’n anelu ato, dyfalbarhad yn wyneb her.” 

Prosiect arall a elwodd o Gronfa Allweddol Pobl a Sgiliau Sir Ddinbych gyda chyllid o £23,550 oedd Twristiaeth Gogledd Cymru gyda’u ‘Academi Twristiaeth a Lletygarwch Gogledd Cymru’. 

Mae'r academi ar agor i bobl ifanc dros 16 oed sy'n byw yn Sir Ddinbych ac sydd allan o waith ar hyn o bryd. Mae'n cynnig cwrs twristiaeth byr, rhad ac am ddim, i gael y bobl ifanc i swyddi o fewn y diwydiant twristiaeth a lletygarwch. 

Mae Jim Jones, Prif Weithredwr Twristiaeth Gogledd Cymru, yn esbonio ymhellach, “Mae ein cyrsiau’n cynnwys elfennau theori, dysgu rhyngweithiol, a gwaith ymarferol i sicrhau bod y bobl ifanc yn barod i gael eu cyflogi. 

“Un o nodweddion allweddol y rhaglen yw ymweld â sefydliadau twristiaeth a lletygarwch amlwg yn Sir Ddinbych. 

“Mae’r profiadau ymarferol yma’n rhoi mewnwelediad amhrisiadwy i arferion gorau’r diwydiant, gan ganiatáu iddynt arsylwi a thrafod cyfleoedd mewn amgylchedd gwaith go iawn. 

“Mae Twristiaeth Gogledd Cymru yn ddiolchgar am gefnogaeth barhaus Cadwyn Clwyd i helpu unigolion yn Sir Ddinbych gychwyn gyrfa yn y diwydiant Twristiaeth a Lletygarwch.” 

Mae’r cyllid yn rhan o Gronfa Ffyniant Gyffredin y DU - Llywodraeth y DU, a fydd wedi darparu cyllid o £2.6 biliwn ar gyfer buddsoddiad lleol ledled y DU erbyn diwedd y flwyddyn hon. 

I gael rhagor o wybodaeth am Cadwyn Clwyd, ewch i https://cadwynclwyd.co.uk.