Trosolwg:

Mae gan S4C weithlu anhygoel ac ymroddedig o tua 125 o unigolion wedi eu lleoli yn ein swyddfeydd yng Nghaerfyrddin, Caerdydd a Chaernarfon ac yn gweithio yn hybrid o'u cartrefi.

Mae hwn yn amser cyffrous i ymuno â ni. Yn dilyn cyfnod heriol, yr ydym am sicrhau ffocws ar ein pwrpas a'n blaenoriaethau strategol. Yn ganolog i lwyddiant hyn bydd sicrhau fod gan S4C amgylchedd gwaith cadarnhaol, cefnogol a chynhwysol, sy'n buddsoddi yn ei gweithlu i ddatblygu sgiliau sydd eu hangen ar gyfer y dyfodol er mwyn perfformio'n dda a fydd yn sicrhau arlwy aml blatfform ardderchog ar gyfer ein cynulleidfaoedd.

Fel aelod o'r adran Gorfforaethol, bydd y Swyddog Pobl a Diwylliant yn gyfrifol am weithredu nifer o'r newidiadau cyffroes sydd i ddod. Byddwch yn cyfrannu at ddenu, cadw a datblygu gweithlu amrywiol a thalentog, a chreu amgylchedd sy'n caniatáu i bawb sy'n gweithio gyda ni deimlo'n ddiogel a bod y gorau y gallent fod.

Mae hon yn rôl sy'n weladwy ar bob lefel, a bydd gofyn i chi feithrin perthnasoedd cryf a dibynadwy ar draws y sefydliad yn cynnwys ein staff a'u cynrychiolwyr ynghyd â'n partneriaid.

Rydym yn chwilio am Swyddog sydd yn gallu cefnogi'r Rheolwr Adnoddau Dynol a Chyfarwyddwr Pobl a Diwylliant wrth weithredu'r dydd i ddydd ar draws amryw o elfennau sydd yn ymwneud ag Adnoddau Dynol. Bydd angen i chi allu cynghori a rhoi cymorth i staff a rheolwyr wrth ddilyn polisïau mewnol ar amryw o bynciau.

Mae'r gallu i gyfathrebu yn ysgrifenedig ac ar lafar yn y Gymraeg a'r Saesneg i safon uchel yn hanfodol ar gyfer y rôl yma.