Bydd Gogglebocs Cymru ‘Dolig yn cael ei gynhyrchu gan gwmnïau Chwarel a Cwmni Da a enillodd y tendr yn gynharach eleni i gynhyrchu Gogglebocs Cymru, y fersiwn Gymraeg o fformat poblogaidd Gogglebox o Channel 4 a Studio Lambert.

Yr enwogion a fydd yn rhan o raglen arbennig y Nadolig yw: y cyflwynwyr radio Huw Stephens a Sian Eleri; cyflwynwyr S4C Emma Walford a Trystan Ellis-Morris; Maggi Noggi a'r digrifwr Kiri Pritchard-McLean; y cyflwynydd rygbi Sarra Elgan, dyfarnwr Undeb Rygbi Cymru Nigel Owens a chyn-seren rygbi Cymru Jonathan Davies; Melanie Owen, Mali Ann Rees a Jalisa Andrews sef y cyflwynwyd podeldiad Mel, Mal, Jal; y grŵp roc Adwaith, sydd wedi ennill Gwobr Cerddoriaeth Cymru ddwywaith; y cogydd enwog, Chris ‘Flamebaster’ Roberts a’i fam; a'r actores, y gantores a'r digrifwr Carys Eleri a'i mam.

Mae'r cyflwynydd a'r digrifwr stand-yp, Tudur Owen, yn dychwelyd i leisio'r sioe.

Bydd y ffilmio yn dechrau yn nhrydedd wythnos Rhagfyr ac yn cael ei darlledu ar S4C a BBC iPlayer nos Fercher 28 Rhagfyr am 9.00pm.

Mae ffigurau gwylio Gogglebocs Cymru wedi bod yn llwyddiant mawr gan ddenu cynulleidfa iau i arlwy‘r sianel.

Dywedodd Prif Swyddog Cynnwys S4C, Llinos Griffin-Williams: “Rwyf wrth fy modd gyda llwyddiant Gogglebocs Cymru. Mae ein cast yn prysur ddod yn enwau cyfarwydd. Roedd hi ond yn naturiol i ni benderfynu comisiynu rhaglen Nadolig arbennig gyda phersonoliaethau Cymreig adnabyddus yn ymuno â chast y gyfres gyntaf.”

Bydd penodau wythnosol o Gogglebocs Cymru yn parhau ar ddydd Mercher drwy gydol Ionawr 2023.