Mae Menter a Busnes yn dechrau ar bennod newydd ac yn cydweddu â dyheadau a gweithgareddau Cymru heddiw a’r dyfodol – meddai’r Prif Weithredwr newydd.

Mae’n weledigaeth a rannwyd gan Llŷr Roberts, sydd newydd ddechrau yn ei swydd newydd, gyda 150 o staff y cwmni mewn cyfarfod arbennig i fapio dyfodol y busnes.

Mae gan Menter a Busnes, a sefydlwyd yn Aberystwyth 30 mlynedd yn ôl, hanes da o gyflawni dros ei gleientiaid ac economi ehangach Cymru. Yn fentrus ac yn greadigol yn ei weithgareddau, mae’r busnes yn meithrin diwylliant unigryw, hyblyg a blaengar ymhlith ei aelodau staff, sy’n gweithio ledled Cymru.

Treuliodd Llŷr ei ddiwrnod cyntaf yn y swydd yn cyfarfod â staff a gofyn iddynt am eu barn ar lwyddiannau a dyheadau’r cwmni.

Dywedodd, “Mae gennym bum swyddfa ledled Cymru a staff hynod brofiadol ac ymroddedig sy’n angerddol am y busnesau a’r cymunedau y maent yn eu gwasanaethu. Nhw yw asgwrn cefn Menter a Busnes a pham rwy’n credu bod ansawdd a hygyrchedd y gwasanaeth a gynigiwn yn rhoi ein cwmni mewn sefyllfa unigryw i ganfod cyfleoedd a chwrdd â’r heriau a wynebir gan economi Cymru nawr ac yn y dyfodol.”

Gydag ymagwedd a phrofiad trosfwaol o weithio ar draws sectorau, mae Menter a Busnes mewn sefyllfa dda i gyflawni er lles Cymru – ar lefelau economaidd, diwylliannol, cymdeithasol ac amgylcheddol.

Dywedodd Llŷr, “Fel cwmni blaengar, rydym am gyfrannu ymhellach at Gymru gydnerth, decach a chynaliadwy. Byddwn yn parhau i sicrhau bod ein gwasanaethau’n hygyrch a’n bod yn gynrychioliadol o’r cymunedau rydym yn eu gwasanaethu.

“Mae cysylltiad annatod rhwng ein nodweddion economaidd a chymdeithasol, ac fel cwmni dwyieithog, byddwn yn parhau i ddathlu a hyrwyddo diwylliant Cymru ar bob cyfle.

“Wrth i ni ymateb i dirwedd economaidd-gymdeithasol esblygol ac argyfwng costau byw, mae’n bwysig ein bod yn parhau i gryfhau ein seilwaith digidol a gwneud defnydd o ymchwil a mewnwelediadau i lywio penderfyniadau.”

Mae proffil rhyngwladol Cymru ar gynnydd, fel y dangoswyd yn ddiweddar gan ymddangosiad y tîm pêl-droed cenedlaethol yng Nghwpan y Byd. Felly mae angen cymorth ar fusnesau Cymru i wneud y mwyaf o gyfleoedd yn y farchnad fyd-eang.

“Mae gan Gymru botensial enfawr. Bydd yna ffocws bob amser ar ddarparu cymorth lleol o safon. Er hynny, dylem hefyd fod yn ymwybodol o’r cyfleoedd i fusnesau mewn marchnadoedd eraill, a dylem fod yn edrych i adeiladu ar ddelwedd Cymru dramor. Mae’n amlwg bod llawer o heriau, ond dylem fod yn gyffrous ar gyfer y cyfleoedd sydd o’n blaenau.”