Fideo newydd gan Thallo yn tynnu sylw at gyflwr personol

Hydref 05, 2022

Erbyn hyn, mae Thallo yn enw cyfarwydd yn y byd cerddoriaeth yng Nghymru a thu hwnt ac yn mynd o nerth i nerth. Mae ei record fer a’i senglau cyntaf o 2021 megis Mêl, Pressed and Preserved a The Water a Carry Me yn 2022 wedi derbyn ymateb gwych.

Mae hi wedi ennyn cefnogaeth gan Sian Eleri (Radio 1) a Huw Stephens (BBC 6 Music a Radio Wales) yn ogystal â recordio sesiwn yn Maida Vale a derbyn canmoliaeth yn y wasg gan gynnwys Wonderland, Noctis, God is in the TV Zine, When the Horn Blows a blogiau yn y DU a’r Unol Daleithiau. Ac ymysg hyn oll wedi perfformio yn The Great Escape a sicrhau lle yng ngŵyl SXSW yn 2023.

A nawr, mae fideo i’r gân Pluo o’r record fer newydd, Crescent, wedi’i ryddhau ar blatfform Lŵp S4C. Ac mae hi’n werth ei gweld.

Mae’r fideo wedi’i ysbrydoli gan ffilmiau arswyd seicolegol a’i saethu mewn man hela ysbrydion poblogaidd, Ysbyty Bron y Garth, cyn-wyrcws ac ysbyty gwag o’r 1800au, sydd wedi rhewi mewn amser. 

“Mae’r lleoliad yn adlewyrchu geiriau Pluo o deimlo’n sownd ac yn dirywio.” Meddai Thallo. Teimlad sy’n gyfarwydd iawn iddi.

Yn 2020, buodd Thallo, neu Elin Edwards sy’n wreiddiol o Wynedd a bellach yn byw yn Llundain, yn dioddef o boen cronig a effeithiodd ar ei symudedd hi yn dilyn salwch sydyn. Mae Pluo yn cyffwrdd â’r boen ryfedd o wylio’r byd yn dychwelyd ar ôl y clo mawr tra ei bod hithau’n gaeth. Mae hi’n ei ddisgrifio fel “fy nghlo personol fy hun.”

Ac mae’r fideo sicr yn adlewyrchu’r teimladau hyn:

“Roeddwn i'n teimlo mor sownd, yn methu â dychwelyd i fy mywyd normal.” Meddai Thallo, “Ond yn bennaf oll, gwaedd o ofn yw’r gân am yr unigrwydd a’r anobaith o gael eich gadael ar ôl tra bod pawb arall yn symud ymlaen.”

Mae’r fideo, sydd wedi’i chyfarwyddo gan Aled Wyn Jones ac Andy Pritchard, yn gweld Thallo yn deffro mewn bath llawn gwaed ar lawr yr ysbyty. A thrwy gydol gweddill y fideo, cawn weld brwydr i geisio dianc o’r adeilad sy’n frith o ddelweddau iasol ac ôl-fflachiadau arswydus sy’n arwain at sylweddoliad go sinistr ar y diwedd.

Mwy

GWELD POPETH

Cwmni Castell Howell yn darparu bwydlen gynaliadwy yng nghinio Nuffield

UAC yn cefnogi tîm pêl-droed Cymru drwy lansio sticer arbennig ar fêls

Cyngor Môn eisiau cefnogaeth Llywodraeth Genedlaethol am gais Porthladd Rhydd

  • Popeth6065
  • Newyddion
    5683
  • Addysg
    2097
  • Hamdden
    1853
  • Iaith
    1606
  • Celfyddydau
    1435
  • Amgylchedd
    992
  • Gwleidyddiaeth
    932
  • Iechyd
    670
  • Llenyddiaeth
    644
  • Cerddoriaeth
    592
  • Arian a Busnes
    521
  • Amaethyddiaeth
    459
  • Bwyd
    420
  • Chwaraeon
    354
  • Eisteddfod Genedlaethol Cymru
    302
  • Gwyddoniaeth a Thechnoleg
    268
  • Ar-lein
    260
  • Eisteddfod yr Urdd
    153
  • Hyfforddiant / Cyrsiau
    59
  • Cystadlaethau
    47
  • Barn
    16
  • Adolygiadau Llyfrau
    13
  • Papurau Bro
    13
  • Adolygiadau Cerddoriaeth
    6
  • Teledu
    5
  • Sioe Frenhinol Cymru
    3
  • Llythyron
    3