Mae Cronfa Ffyniant Gyffredin Llywodraeth y DU wedi dyrannu £400,000 i Gyngor Sir Ynys Môn er mwyn rhoi hwb i’n menter ‘Ynys Actif’.   

Mae Môn Actif, Gwasanaeth Hamdden y Cyngor, wedi cymeradwyo 30 o geisiadau llwyddiannus gan amrywiaeth o wahanol glybiau a sefydliadau gwirfoddol – gan eu galluogi nhw i gynyddu’r niferoedd sy’n cymryd rhan.

Yn ddiweddar, mae Clwb Hwylio Caergybi, un o’r ymgeiswyr llwyddiannus, wedi gallu cyflwyno hwylio i fwy o blant a phobl ifanc; tra bo Neuadd Bentref Llanddona wedi gallu annog y genhedlaeth hŷn i wneud mwy o ymarfer corff drwy eu menter campfa werdd. 

Dywedodd Deilydd Portffolio Hamdden y Cyngor, y Cynghorydd Neville Evans, “Mae’r cyllid hwn i’w groesawu ac wedi helpu ein clybiau chwaraeon a sefydliadau gwirfoddol ar draws yr Ynys. Mae’r prosiectau yr ydw i wedi ymweld â nhw hyd yma wedi bod yn ddiolchgar iawn o’r cyllid ac maent yn edrych ymlaen at y cyfleoedd a fydd yn codi ar gyfer y cymunedau lleol.” 

Ychwanegodd, “Mae’r cyllid pwysig hwn yn galluogi sefydliadau i gynyddu’r niferoedd sy’n cymryd rhan mewn gweithgareddau corfforol – gan helpu i wneud Ynys Môn yn ‘Ynys Actif’. Mae hefyd yn cefnogi nod cyffredinol y Cyngor o ‘greu Ynys Môn iach a llewyrchus lle gall pobl ffynnu’.” 

Dywedodd Christian Branch, Pennaeth Rheoleiddio a Datblygiad Economaidd y Cyngor, “Bydd y cyllid grant hwn yn rhoi hwb angenrheidiol i nifer o glybiau chwaraeon a sefydliadau gwirfoddol ar yr Ynys. Mae darparu adnoddau er mwyn gallu cymdeithasu, gwneud ymarfer corff a chadw’n heini yn hynod bwysig er mwyn gallu hyrwyddo iechyd a llesiant ein trigolion ac ymwelwyr. Hoffwn ddiolch i swyddogion Môn Actif am eu holl waith caled wrth sicrhau a dosbarthu’r cyllid grant.”