Kayley Sydenham o Gasnewydd yn Brifardd Eisteddfod T

Wrth i Eisteddfod T ddod i derfyn ym mhrydferthwch arfordir Bae Ceredigion, cyhoeddwyd mai Prifardd Eisteddfod T yw Kayley Sydenham o Gasnewydd.

Ar ôl gorffen sefyll ei Lefel A yn Ysgol Gyfun Gwynllyw, edrychai Kayley ymlaen at fynd i’r Brifysgol i astudio’r Gymraeg a Newyddiaduriaeth ym mis Medi. Cyfansoddi ac arlunio yw ei phrif ddiddordebau, a gwnaeth Kayley y mwyaf o’r cyfnodau clo hir drwy barhau ar ei thaith i feistroli’r gynghanedd, yn ogystal â chychwyn menter creu printiau Cymreig ar leino.
 
Datgelwyd mai Kayley oedd Prifardd Eisteddfod T yn seremoni olaf yr ŵyl, a ddarlledwyd yn fyw o Wersyll yr Urdd Llangrannog, ble roedd y beirniad Mererid Hopwood yng nghwmni’r tri chystadleuydd terfynol.

 

“Dim ond barn un, ydy barn beirniad,” meddai Mererid Hopwood yn ystod y seremoni. “Y peth pwysicaf felly yw llongyfarch pawb. Waeth pwy fydd yn cipio safle’r cyntaf heddiw, mae’r tri sydd yma ym mhafiliwn arbrofol Eisteddfod T yn enillwyr.”
Roedd gofyn i’r cystadleuwyr lunio cerdd gaeth neu rydd heb fod dros 70 llinell, ac er i 40 gystadlu, cerdd Kayley oedd yn cynnig “y cyfanwaith mwyaf gorffenedig yn y gystadleuaeth eleni”.

 

“Fel cerdd mae’n argyhoeddi’r darllenydd o weledigaeth ddidwyll,” ychwanegodd y beirniad. “Yn ei huchelgais, dydy hi ddim yn syrthio i’r fagl o fod yn rhy astrus ond yn hytrach yn defnyddio delweddau’n sylwgar i ddweud ei dweud yn grefftus, synhwyrus.”
Mae Kayley yn derbyn tlws wedi ei greu yn arbennig gan y cerflunydd Ann Catrin Evans. Yn ail oedd Ciarán Eynon o Landrillo-yn-rhos, Conwy (a ddaeth yn drydydd yng nghystadleuaeth Prif Lenor Eisteddfod T ddoe) ac yn drydydd  oedd Tegwen Bruce-Deans o Landrindod, Maesyfed. Noddwyd y gystadleuaeth hon gan Brifysgol Aberystwyth.

 

Llwyddiant ysgubol 

 

Mae Eisteddfod T wedi profi’n llwyddiant ysgubol unwaith eto eleni gyda chynulleidfaoedd radio, teledu ac ar-lein drwy gydol yr wythnos. Daw'r ŵyl i ben heddiw ar ôl wythnos lawn o ddarlledu o’r stiwdio arbennig yng Ngwersyll yr Urdd Llangrannog. Gellir dod o hyd i holl ganlyniadau’r ŵyl drwy ymweld â’r wefan s4c.cymru/urdd ac ar gyfryngau cymdeithasol yr Urdd gyda’r hashnod #EisteddfodT.